قصص وروايات
رواية سامحيني يا ماما
سامحيني يا ماما
بقلم/ إيمان فتوح
كل حاجة نقصاكي ف غيابك
مفتقداكي..القاعدة وحشاكي
غيابك كاسرني وصوت وجعك زمان لسة قاهرني
كل حاجة لسه زي م هي
وعدتينا إن إنتي باقية
طب لي مشيتي؟
هوا إنتي مش كنتي متفقة تكملي معانا؟
الدنيا بعدك وجعانا
حتي كل حاجة دافية سقعانة
والشقة محتاجة تتمسح
والهدوم عاوزة تتغسل
كل حاجة حالفة متنضفش إلا بيكي
وحتتنا ضلمة حُزنًا عليكي
ووحدتنا عمالة توسع
احنا بعدك نار بتولع
احنا بعدك منساويش
روحنا بعدك ريش ف ريش
روحنا بعدك ف انهيار
وحزن حالف م ينتهي إلا بدمار
احنا بعدك مهزومين
طب قوليلي نروح لمين؟
وانتي حضنك كان حياة
ودوا لكل وجع مسحوب ب آه
كنتي بيت مليان حنان
كنتي لمانا ف أمان
كان معاكي كل الحنان
ولما روحتي أخدتيه معاكي
سيبتيلنا بس الذكريات
ووجع وكام حبة حاجات
والهدوم اللي ف دولابك
والريحة اللي ف مكانك
وطيفك اللي راح وراكي
سيبتيلنا اي غير دفاكي
اللي بَعدك بقي بردان
عاملة اي ياما كمان
احكيلي شوية عنك
لحظة عاوزة اقولك
إني ف كل راكعة ذاكرة فيها اسمك
وعمالة بدعيلك بالرحمة وافتكرك
وادعي ربي يجمعني بيكي
ياللي حلوة بلون عنيكي
وبسمة كانت نور لقلبي
ولما غابت صِرت وحيد
ياللي صوتك كان ف ودني
غنوة حلوة بلون جديد
ياللي موتك صحي فيا أوجاع
لمالانهاية
نفسي لما نتقابل اقولك إنك والله وحشاني بأمانة
قلبي راضي بالوجع والاهانه بس ف وجودك
وحشتيني ي ماما ووحشني كلامك ليا وردودك
وحشتيني ي ماما حتي ضربك فيا وزعيقك
وحشتيني ي ماما ولسة بحلم اني اجيلك
ولسه بحلم إني اجيلك
وحشتني الأيام الحلوة
والقاعدة الدافية وبراد الشاي
والضحكة اللي بتعلي بغناوي
وحشني كلامك والحكاوي
وصريخ الضحك ع البلاوي
اللي بنعملوها ونحكهوهالك
وانتي بنفس راضية بتفهمينا
وعمر م قلبك رضي يجي علينا
ودايما ف صفنا وماسكة ف ايدينا
حتي واحنا مزعلينك
يسلم يمينك ياللي كنتي أحن قلب
وكنتي مهما الوقت شد بترخي انتي وتطمنينا
كان نفسي أقولك خليكي لينا
بس القدر مرضييش بذلك
ونصيبنا إنك تفارقي
فضلت اقولك سامحيني لو تحبي
سامحيني ع زعلي ليكي
وإني كنت يوم بنت غير بارة
أنا والله بعد موتك حاسة إني روحي برا
وإني ندمانة لدموعك
وإني نفسي أبوس دماغك
واتأسفلك ع كل لحظة كنت فيها ليكي قاسية
وانتي كنتي ليا حاضنة
سامحيني ي ماما لو جرحتك حتي مرة
والا صوتي فيكي عَالا
سامحيني ي ماما وانتي عارفة أن إنتي غالية
سامحيني ي ماما ياللي روحك ليا ساندة
حتي بعد موتك لسة فيا ماسكة
سامحيني ي ماما لو جرحتك حتي مرة.
